Бүгінгі таңда мемлекеттік тілді меңгеру – қоғамның әрбір мүшесі үшін маңызды міндет. Осы мақсатта Степногорск қаласында мемлекеттік тілді оқытуға арналған оқыту-әдістемелік орталығы сәтті жұмыс істеп келеді. Бұл орталық қазақ тілін үйренуге ниетті азаматтарға сапалы білім беріп қана қоймай, олардың тілді күнделікті өмірде еркін қолдануына мүмкіндік жасайды.
Мемлекеттік тілді үйренушілерге қолайлы жағдай жасау мақсатында Заводской және Шаңтөбе кенттерінде де қазақ тілін оқытуға арналған арнайы кабинеттер жұмыс істейді. Бұл кабинеттер тұрғындарға жақын орналасқандықтан, тіл үйренушілерге ыңғайлы әрі қолжетімді. Мұнда кез келген адам қазақ тілін меңгеруге мүмкіндік ала алады. Орталықта кәсіби білікті, тәжірибелі мамандар жұмыс істейді.
Олардың басты міндеті – заманауи әдіс-тәсілдерді пайдалана отырып, тіл үйренушілерге сапалы білім беру. Мұнда сабақтар қызықты әрі тиімді өтуі үшін интерактивті әдістер, жаңа технологиялар, практикалық тапсырмалар және ойын элементтері кеңінен қолданылады. Осының арқасында тіл үйрену процесі жеңіл және нәтижелі болуда.
Қазақ тілін үйренушілер үшін «КАЗТЕСТ» бағдарламасы негізінде 120 сағаттық оқыту жүйесі қарастырылған. Бағдарлама бастауыш, жалғастырушы және тереңдетілген деңгейлерден тұрады. Оқуды толық аяқтаған тыңдаушыларға сертификаттар беріледі.
Сонымен қатар, курс барысында тыңдаушылар тілдік ортаға бейімделіп, түрлі мәдени шараларға, тілдік тәжірибе сағаттарына, пікірталастарға қатысу арқылы қазақ тілінде еркін сөйлеуге үйренеді. Орталық тек қазақ тілін ғана емес, ағылшын тілін үйренгісі келетіндер үшін де арнайы курстар ұйымдастырады. Заманауи әдістерді қолданатын тәжірибелі мамандардың көмегімен тыңдаушылар ағылшын тілінің негіздерін меңгеріп, шет тілінде еркін қарым-қатынас жасауға үйренеді.
Бұл – қазіргі заман талабына сай қажетті дағдылардың бірі. Орталық мемлекеттік тілді дамыту мақсатында қаладағы жарнама, баннерлер, билбордтар және қоғамдық көліктердегі жазулардың сауаттылығын тексеріп, тұрақты түрде рейдтік жұмыстар жүргізіп отырады. Степногорск қаласындағы мемлекеттік тілді оқыту орталығы еліміздегі тіл саясатын жүзеге асыруға, қазақ тілінің қолданыс аясын кеңейтуге және халықтың тілдік сауаттылығын арттыруға үлкен үлес қосып келеді. Тіл үйрену – жеке тұлғаның дамуына ғана емес, қоғамның тұтастығына, елдің болашағына да зор ықпал ететін маңызды қадам. Егер сіз қазақ немесе ағылшын тілін үйренгіңіз келсе, Степногорск қаласындағы мемлекеттік тілді оқыту орталығы сізге есігін айқара ашады!
Орталықтың мекенжайы: 3 шағынаудан 16Б.
Байланыс телефондары: +7 701 135 62 13
К.Ұзақбаева, Степногорск қалалық оқыту- әдістемелік орталығының оқытушысы
