Кейінгі жылдары Наурыз мейрамы 10 күнге ұласып, ерекше қарқынмен тойланып келеді. Барша еліміз сияқты Степногорск қаласында да бұл мерекеге айрықша мән беріліп, түрлі мәдени және спорттық жарыстар ұйымдастырылады.
14 наурыздан бастап Степногорск қаласы мен ауылдық жерлерде Наурыз мерекесіне орайластырылған мерекелік іс-шаралар басталды. Бұл – көктем мен жаңару мерекесі ғана емес, сонымен қатар жергілікті тұрғындардың әртүрлі салалардағы жетістіктерін көрсететін есепті кезең. Мерекелік шаралар қала мен ауылдың тыныс-тіршілігін біріктіріп, ұрпақтар арасындағы сабақтастық символына айналады.
Соның бірі – Көкшетау қаласындағы «Достар» мәдениет үйінде өткен «Қазыналы қария» байқауына Қырық құдық ауылының атынан қатысқан апамыз Аубай Дүрімхан бас жүлдені иеленіп, жеңіске жетті. Оның жеңісі Наурыз мерекесінің рухын, яғни дәстүр мен мәдениет сабақтастығының маңыздылығын паш етті. Сондай-ақ Көкшетау қаласында өткен «Әдепті келін – отбасы көркі» облыстық байқауында Степногорск тұрғыны Риза Болат II дәрежелі дипломмен марапатталды.
Бұл байқауда қатысушылардың сыртқы сұлулығы ғана емес, сонымен қатар әдептілік қырлары мен дәстүрлерге адалдықтары бағаланды. Мереке аясында қаладағы «Горняк» мәдениет сарайында тоғызқұмалақтан қалалық жарыс өтті. Жарысқа 21 үміткер қатысты, ал жеңімпаздар арасында Мәдина Мерей мен Мағауия Жаннұр ерекше көзге түсті. Степногорсктағы Наурыз мерекесі еліміздің бай мәдени мұрасын, оның ішінде ұлттық ойындарды насихаттау ғана емес, сондай-ақ қоғамдық қарым-қатынастарды нығайту мен ұлт ретінде ортақ құндылықтарымызды дәріптеу жолында маңызды қадам болды.
