Көктемгі су тасқыны – еліміздің көптеген өңірлері үшін өзекті мәселелердің бірі. Әсіресе, өзен-көлдердегі мұздың күрт еруі мен су деңгейінің көтерілуі елді мекендер мен жолдарға қауіп төндіруі мүмкін. Осыған орай 4 наурызда Степногорск өңірінде төтенше жағдайлардың алдын алу және су тасқыны қаупін азайту мақсатында Селеті өзенінің арнасында мұз жару және қопсыту жұмыстары жүргізілді.
Жару жұмыстары Изобильное ауылы маңындағы автокөлік көпірінің алдында ұйымдастырылды. Бұл іс-шара жергілікті атқарушы орган бекіткен жоспарға сәйкес, «Алтыналмас» АҚ тарапынан өтеусіз негізде жүзеге асырылды. Мамандар мұз кептелістерін болдырмау және өзен арнасындағы судың еркін ағуын қамтамасыз ету үшін 700 шаршы метр аумақта мұзды қопсытып, арнайы жарылыс жұмыстарын жүргізді. Осындай қауіпсіздік шаралары көктемгі су тасқынының алдын алуға, өзендердің табиғи арнасымен еркін ағуына мүмкіндік беріп, жақын маңдағы елді мекендерді су басу қаупін төмендетуге бағытталған. Алдағы уақытта да төтенше жағдайлардың жолын кесу мақсатында кешенді жұмыстар жалғасатын болады.
