Фото: https://www.instagram.com/stepnogorsk_qalasynyn_akimdigi/ парақшасынан алынды.
Спорт – денсаулық кепілі ғана емес, бірлік пен достықтың да айнасы. Осындай игі мақсаттарды көздеген кәсіпорындар мен ұйымдар арасындағы ХХХІІ кешенді қалалық спартакиада осы жылдың 11 ақпаны мен 20 ақпаны аралығында ұйымдастырылды.
Спартакиада бағдарламасында өткен волейбол жарыстары қатысушылар үшін ерекше спорт мерекесіне айналып, олардың шеберлігін, төзімділігі мен командалық рухын паш етті. Қаланың түрлі кәсіпорындарынан жиналған алты команда додаға түсіп, жеңіске жету жолында бар күш-жігерін салды. Шешуші сәттерде спортшылардың төзімділігі мен ұйымшылдығы айқын байқалды.
Қорытынды бойынша үздік ойын көрсеткен Білім бөлімінің командасы чемпион атанды.
Олар жарыс бойы тұрақты әрі шабытты ойын үлгісін көрсетті. Екінші орынды Степногорск Тау-кен химиялық комбинатының командасы иеленсе, үшінші орын Степногорск Подшипник зауытының командасына бұйырды. Барлық жүлдегерлер арнайы диплом, кубок, медальдармен марапатталды. Жарысты ұйымдастырушылар төрешілер құрамына және барлық қатысушыларға алғыстарын білдірді.
Спортшылар арасындағы өзара құрмет пен достық қарым-қатынас жарыстың мәнін арттыра түсті. Төрешілер мен ойыншылар келесі спартакиадада қайта қауышу ниетімен қол алысып тарқасты.
Бұл спартакиада қатысушыларға тек спорттық жетістіктерге жетуге ғана емес, сонымен қатар денсаулықты нығайтуға, жаңа достар табуға және командалық рухты арттыруға мүмкіндік берді. Мұндай жарыстардың маңыздылығы қоғамда салауатты өмір салтын насихаттау мен спорттық мәдениетті дамытуда зор үлес қосатынында. Алдағы уақытта да мұндай спорттық шаралар көптеп ұйымдастырылып, қала тұрғындарына сергектік пен жігер сыйлайтынына сенім мол.
