Қалада жеті мемлекеттік мәдени клубтық нысан жұмыс істейді. Олар: «Горняк», «Достық және шығармашылық үйі» мен Ақсу, Шаңтөбе, Бестөбе, Изобильный, Заводской ауылына қарасты мәдениет үйлері. Ал орталықтандырылған кітапхана жүйесі 12 кітапхананың басын біріктіреді. Оның ішінде екеуі қалалық, алтауы ауылдық, төртеуі елді мекен кітапханасы. Мәдениет мекемелерінде 2 548 адам қатысатын 96 клубтық құрылым жұмыс істейді.
Балаларға арналған 46 үйірменің де бар екендігі қуантады. Степногорск қаласының Мәдениет, тілдерді дамыту, дене тәрбиесі және спорт бөлімінің басшысы Әсел Тәубәқызы: «2024 жылы қаланың клубтық мәдени нысандарын дамытуға 710 миллион теңгеге жуық қаражат бөлінді. Бұл алдыңғы жылмен салыстырғанда 95 миллионға артық.
«Достық және шығармашылық үйі» мен ауыл-аймақтағы мәдениет үйлерін қоса алғанда, бірнеше мәдениет нысанында жөндеу жұмыстары жүргізілді. Қазіргі күні «Эстрада театры» ғимараты апаттық жағдайда тұр, күрделі жөндеуді қажет етеді. 717 миллион теңгеден астам сомаға жобалық-сметалық құжаттама әзірленді. Ендігі жерде қала жөндеу жұмыстарын жүргізу үшін облыстық бюджеттен 2025 жылға қаражат бөлінуін күтіп отырмыз» деп, игерілген қаражат пен жоспарлы жұмыстардың бір парасын саралап берді.
Жалпы алғанда, қаладағы мәдени өмір қарқынды дамып келеді. Өткен жылы 4 052 мәдени-көпшілік іс-шара өткізіліп, оны жалпы саны 1,5 миллионнан астам көрермен тамашалаған. Ауылдық жерлерде 476 шара ұйымдастырылып, қалың көрерменнің қошеметіне бөленген. Осы жерде айта кетейік, мәдениетке демеушілік танытып, ұлттық мерекелерге ұдайы қолдау көрсетіп келе жатқан алпауыт мекемелер де баршылық. Олардың қатарында «Алтыналмас АК» АҚ қаланың 60 жылдығын мерекелеуге 10 миллион теңге қаражат бөлсе, ал «Қазақалтын» ЖШС «Рауан» мәдениет үйін жылытуға қажетті жабдықтарын сатып алуға қаржы бөлді.
«Бізде үздіксіз еңбек етіп келе жатқан тоғыз қызметкер «Мәдениет саласының үздігі» атағына лайықталған. Өткен жылы біршама музыкалық аспаптарымыз бен құрал-жабдықтарымызды, сахналық киімдерімізді жаңартқан болатынбыз. Ең бастысы, қаланың мәдениет саласын дамыту үшін барын салатын білімді азаматтардың көп екендігі бізге ұмтылыс пен серпін береді», дейді Степногорск қаласының Мәдениет, тілдерді дамыту, дене тәрбиесі және спорт бөлімінің басшысы Әсел Тәубәқызы.
СПОРТ – ЗАМАН ТАЛАБЫ
Қаланың дене шынықтыру және спорт саласында ауыз толтырып айтатындай жетістіктер баршылық. Қала тұрғындарының 43%-ы спортпен жүйелі түрде айналысады екен. Қалада жұмыс істеп тұрған 112 спорттық нысанда жалпы саны 30 мың адам спортпен шұғылданады. Оның ішінде стадиондар, спорт кешендері, шаңғы базалары және бассейндер бар. 2024 жылы дене шынықтыру және спортты дамытуға 35 миллион теңгеден астам қаражат бөлінді, бұл алдыңғы жылмен салыстырғанда айтарлықтай көп.
Бір жыл ішінде 230 түрлі бағыттағы спорттық іс-шаралар ұйымдастырылған. Степногорск спортшылары облыстық, республикалық және халықаралық жарыстарға қатысып, жүлделі орындарға ие болып жүр. Өткен жылы қаланың құрама командалары «Хрустальный колос», «Надежда», «Құлагер» және «Ақ бидай» облыстық спартакиадаларында табысты өнер көрсетіп, жүлделі ІІ, ІІІ орындарды иеленді. Қалада сондай-ақ, скандинавиялық жүріс фестивальдары, мүгедектігі бар азаматтардың арасындағы спартакиадалар және басқа да спорттық іс-шаралар тұрақты түрде өткізіліп жүр.
ТІЛІ БІРДІҢ – ТІЛЕГІ БІР Степногорск қаласында қазақ тілін меңгерген халықтың үлесі 76,5%-ды құрайды. Қазақ және ағылшын тілдерін үйренуге мүдделі барлық тұлғаларға қаланың оқыту-әдістемелік орталығында білім деңгейлері бойынша тегін курстар ұйымдастырылып келеді. Мемлекеттік тілді үйренушілер – 340 адам болса, ағылшын тілін – 40 адам меңгеруді көздейді. Ономастика саласы бойынша жұмыс қарқыны да жаман емес. Бұл бағыттағы атқарылған мардымды жұмыстар — ды саралаған бөлімінің басшысы Әсел Бабаева: «Изобильный аулының Казахстанская көшесі – Қазыбек би, Торгайская көшесі – Ынтымақ көшесі деп атауы ауыстырылды. Сонымен қатар Шаңтөбе кентінің 5 көшесін қайта атау бойынша құжаттар облыстық ономастикалық комиссиясының қарауына жолданған.
Степногорск қаласының 2 көшесін – Степная көшесін Мәншүк Маметова, Парковая көшесін Қажымұқан етіп ауыстыру үшін Республикалық ономастикалық комиссиясының оң қорытындысын алып, құжаттар облыстық әкімдікке жолданып отыр», дейді. Атқарылуы уақыт күттірмейтін маңызды жұмыстардың қатарында «Эстрада» театрын күрделі жөндеуден өткізіп, «Горняк» мәдениет үйінің шатыры мен терезелеріне жөндеу жүргізу, «Достық пен шығармашылық» үйі ғимараттарына архитектуралық жарықтандыру орнату бар. Қалада сондай-ақ, көптеген мәдени және спорттық іс-шаралар, оның ішінде фестивальдар, конкурстар, концерттер және спартакиадалар өткізу жоспарланған. Алда өткізілетін ауқымды шаралардың бірі – Қазақстан Ассамлеясының 30 жылдығына арнап ауқымды концерт беру, ал «Көрісу күні» – театрландырылған қойылымды сахналау. Ұлыстың ұлы күні Наурыз мерекесінде қазақ халқының салт-дәстүрін барынша дәріптеп, ұлттық құндылықты насихаттау көзделіп отыр. Қала тұрғындарының өмірін қызықты және мазмұнды ететін жаңа жобаларды жүзеге асыру алдағы уақыттың еншісінде.
