Степногорск қаласының әкімі Гайдар Қасенов жұмыс сапары барысында Қарабұлақ ауылындағы бірқатар маңызды әлеуметтік нысандарды аралап, жергілікті мамандармен пікірлесті, деп хабарлайды altynqala.kz тілшісі.
Осы сапарында қала басшысын ауыл әкімі Мұсылманбек Исмағұлов қарсы алып, жол бастап жүрді. Гайдар Қабдоллаұлы алдымен жалпы білім беретін мектепке барып, оқу үрдісінің ұйымдастырылуымен танысты. Ол мектептегі оқу кабинеттерін, спорт залын, кітапхананы және асхананы аралап, білім беру сапасын жақсарту үшін жасалып жатқан жұмыстарға назар аударды.
Сонымен қатар білім ордасындағы «Балапан» шағын орталығында болды. Бұл орталық 2-ден 5 жасқа дейінгі балаларды мектепке дейінгі білім нұрымен шуақтандырады. Оқу сыныптары қазақ және орыс тілдерінде оқытатын екі топқа бөлінген.
«Ертеңгі елдің болашағы – бүгінгі жас ұрпақтың қолында. Сондықтан да олардың сапалы білім алуына жағдай жасау – басты міндетіміз», деп атап өтті қала басшысы.
Гайдар Қабдоллаұлы осы сапарында ауыл тұрғындарына мемлекеттік қызметтерді жылдам әрі сапалы көрсететін «Сервистік әкімдік» нысанына да арнайы барды. Аталған мекеме заманауи техникамен жабдықталған, мұнда өзіне-өзі қызмет көрсету секторы мен ыңғайлы күту орындары қарастырылған.
«Тұрғындардың уақытын үнемдеп, қызмет көрсету сапасын жақсарту – басты мақсатымыз. Мұндай орталықтар халықтың қажеттіліктеріне жедел жауап беруге мүмкіндік береді» деді әкім.
Сапар соңында Қарабұлақ ауылындағы фельдшерлік-акушерлік пункттің жұмысын бағалап, жағдайын тексерді. Мұндағы медициналық мекеменің қызмет көрсету сапасы, жабдықталуы және дәрігерлердің жұмысы әкімнің назарынан тыс қалған жоқ. «Ауыл тұрғындары сапалы медициналық көмек алуы тиіс. Бұл бағытта жұмыстар жалғасады», деп түйіндеді қала басшысы. Қарабұлақтағы әлеуметтік нысандарды аралау барысында анықталған мәселелер назарға алынып, алдағы уақытта оларды шешу жолдары қарастырылмақ. Халық игілігі үшін жасалған жұмыстар жүйелі түрде жалғасын табады.
