Ақмола облысының әкімі Марат Ахметжанов Степногорск қаласына жасаған жұмыс сапары барысында өңірдің техникалық және кәсіби білім беру жүйесінің дамуына ерекше көңіл бөлді. Ол Тау-кен техникалық колледжіне барып, оқу орнының материалдық-техникалық базасымен танысып, білім ордасының жетістіктерін көзбен көрді, деп хабарлайды altynqala.kz
Сондай-ақ зертханаларды аралап, ұстаздармен, өндірістік оқыту шеберлерімен және студенттермен еркін пікір алмасты. Колледждің жұмысымен танысқан өңір басшысы мұндағы кәсіби даярлық деңгейіне жоғары баға беріп, білім беру сапасын арттырудың маңыздылығын атап өтті.
Тау-кен техникалық колледжінің зертханалары мен оқу-өндірістік шеберханалары заманауи технологиялармен жабдықталған. Бұл жетістік, әсіресе «Жас маман» бағдарламасы мен әлеуметтік серіктестердің қолдауы арқасында жүзеге асырылған. Соның бір дәлелі ретінде 2022 жылы «Алтыналмас АК» АҚ студенттердің кәсіби даярлығын арттыру мақсатында арнайы зертханалық құрал-жабдықтар тарту етті. Мұндай қолдау шәкірттердің теориялық білімдерін тәжірибемен ұштастырып, олардың болашақта бәсекеге қабілетті маман болып қалыптасуына зор мүмкіндік береді.Кездесу барысында облыс әкімі 2025 жылдың Президент Жарлығымен «Жұмысшы мамандықтар жылы» болып жарияланғанын ерекше атап өтті.
– Бұл бастама жұмысшы мамандықтарының мәртебесін көтеріп, олардың қоғамдағы орнын айқындауды, заңнамалық өзгерістер енгізуді көздейді. Сонымен қатар колледж түлектеріне жоғары білім алуға мүмкіндік беру мақсатында арнайы гранттар бөлінеді. Бұл жастардың техникалық және кәсіптік білімді игеруге деген ынтасын арттырып, олардың кәсіби өсуіне жаңа серпін бермек, – деді Марат Ахметжанов. Құрылғанына 30 жыл болған Степногорск тау-кен техникалық колледжі өңірдегі өндірістік кәсіпорындарға қажетті мамандар даярлауда жетекші оқу орындарының бірі саналады.
Бүгінде мұнда заманауи білім беру әдістерін енгізіп, кәсіпорындармен тығыз әріптестік орнатып, жастардың жұмысшы мамандықтарына қызығушылығын арттыру бағытында жүйелі жұмыс жүргізіп келеді. Колледж директоры Елена Тарасова оқу орнында 500-ге жуық студент 10 түрлі мамандық бойынша білім алып жатқанын жеткізді. Олардың 40 пайызы өңірдегі кәсіпорындармен мақсатты келісімшарт негізінде оқиды, ал 146 студент дуальді оқыту жүйесі арқылы өндірістік тәжірибеден өтуде. Бұл жүйе студенттердің тек теориямен шектелмей, нақты өндіріс жағдайында шыңдалуына мүмкіндік береді.
– Біздің басты мақсатымыз – кәсіби білікті маман дайындау. Бүгінде колледж түлектерінің үштен бірі жоғары білім алуды жалғастыруда, ал 80 пайыздан астамы оқуын аяқтаған соң, бірден жұмысқа орналасады. Бұл жайт біздің оқу орнымыздың сапалы білім беретінін және қалада жұмысшы мамандықтарына сұраныстың жоғары екенін көрсетеді, – деді колледж директоры. Жастардың жұмысшы мамандықтарына деген қызығушылығын ояту – ел экономикасының өркендеуіне негіз болмақ. Себебі тау-кен өндірісі, құрылыс, машина жасау, металлургия сияқты стратегиялық маңызды салалар жоғары білікті жұмысшыларға зәру. Олардың білімі мен тәжірибесі өнеркәсіптің дамуына, жаңа технологиялардың тиімді игерілуіне тікелей әсер етеді. Сондықтан бүгінгі таңда кәсіби білім беру жүйесінің заман талаптарына сай болуы аса маңызды.
Жұмыс сапары барысында әкім өңірдегі техникалық және кәсіптік білім берудің болашағына сенім білдіріп, колледж ұжымына табыс тіледі. Оның айтуынша, кәсіби мамандар даярлау тек оқу орындарының ғана емес, бүкіл қоғамның ортақ міндеті болуы тиіс. Ал жастардың кәсіптік білімге деген қызығушылығын арттыру мақсатында мемлекет тарапынан жан-жақты қолдау көрсетіле бермек. Бұл игі бастамалардың бәрі жұмысшы мамандықтарының беделін көтеріп, олардың қоғамдағы орнын айшықтай түсетіні сөзсіз. Сондықтан Степногорск Тау-кен техникалық колледжі болашақта да білікті кадрлар даярлау ісінде көшбасшы оқу орындарының бірі болып қала бермек.
