Степногорск қаласында жаңа денешынықтыру-сауықтыру орталығы бой көтерді, деп хабарлайды altynqala.kz
Степногорск қаласы өзінің спорттық өмірінің жаңа бір жарқын бетін ашты. Аймақ халқын салауатты өмір салтына үндеп, денсаулықтарын нығайту және спортты дамыту мақсатында үлкен маңызға ие нысан – жаңа денешынықтыру-сауықтыру сарайының пайдалануға берілуі әсіресе жастар үшін үлкен қуанышқа айналды. Оның ашылу салтанаттына Ақмола облысының әкімі Марат Ахметжанов, жергілікті атқарушы билік өкілдері, қоғам қайраткерлері және танымал спортшылар қатысты.
Ақмола облысының әкімі Марат Ахметжанов спорт сарайының ашылуы өңір үшін тарихи сәт екенін атап өтті. Ол Степногорск – спорттық дәстүрлерімен танымал қала болғанын және жаңа кешенде болашақ чемпиондар тәрбиеленуі керектігін жеткізді. – Біз спорттың әр адамға, баладан қарияға дейін қолжетімді болуына бар күшімізді салып жатырмыз. Мұндай нысандар – тек жаттығу орындары ғана емес, олар қоғамды біріктіріп, жастарды шабыттандырып, салауатты өмір салтын қалыптастыруға көмектесетін алаңдар. Бұл кешен қала тұрғындарының мақтанышы болып, ұзақ жылдар бойы халыққа қызмет етеді деген сенімдемін», – деді аймақ басшысы. Кешеннің ашылу салтанатында арнайы спорттық көрсетілімдер көрсетіліп, құтты болсын айта келген қауымға ғимаратты аралатып, экскурсия ұйымдастырылды. Орталық бүгінде барлық жастағы азаматтарды қабылдауға дайын. Мұнда ауыр атлеттер, боксшылар, балуандар және балалар футбол командасы жаттығуларын бастап кетті.
«Жаңа спортзалымыз өте ұнады, футбол алаңы да ыңғайлы әрі кең. Біздің команда Көкшетау, Астана және Қарағанды қалаларында өткен жарыстарға қатысты. Біз чемпион болуды мақсат етеміз, сондықтан жаттығуларымызды одан әрі қарқынды жүргізетін боламыз», – дейді Степногорск футбол командасының капитаны Максим Атамась.
Күрес жаттықтырушысы Ернар Қараманов осы залдың ерекше атмосферасын жоғары бағалап, сөзін былай жалғастырды:
– Бұл жерде әлем чемпиондары Нұрқожа Қайпанов пен Ризабек Айтмұқан сияқты даңқты спортшылар жаттықты. Болашақта осы залдан тағы да көптеген үлкен жетістіктерге қол жеткізетін чемпиондар шығады деп сенемін. Олар еліміздің абыройын асқақтатып, туын биікке көтеретін болады! – деді.
Айта кетейік, спорт сарайында бір уақытта мыңға жуық спортшыға оқу-жаттығу жұмыстарын жүргізуге мүмкіндік береді. Ол заманауи талаптарға сай салынған және барлық қажетті жабдықтармен қамтамасыз етілген. Кешен блоктарға бөлінген, әр блокта екі залдан орналасқан.
– Кешеннің жалпы алаңы 2 600 шаршы метрден астам. Жаңа спорттық нысан екі негізгі блоктан тұрады. Бірінші блокта волейбол мен мини-футбол сияқты командалық ойындарға арналған кең әрі көпфункциялы зал орналасқан. Екінші блокта әртүрлі спорт түрлеріне, соның ішінде тренажер залы, фитнес және сауықтыру-дене шынықтыруы, күрес және бокс секілді бөлмелер қамтылған. Сонымен қатар ерекше қажеттіліктері бар адамдар үшін арнайы қолайлы жағдайлар жасалған,– дейді кешеннің құрылысын жүргізген «AN Groups» ЖШС директоры Дархан Шотабаев.
Бұл жоба облыстық спорт инфрақұрылымын дамыту бағдарламасы аясында жүзеге асты. Ғимарат аймақтық деңгейдегі үлкен спорттық іс-шаралар мен жарыстар өткізуге арналған маңызды алаңға айналмақ.
Сондай-ақ аймақ басшысы Марат Ахметжанов Степногорск қаласына келген осы сапарында шаһардағы тағы басқа бірнеше маңызды әлеуметтік мекемелерді аралап, олардың жұмыс барысымен жақынырақ танысқанын да тілге тиек ете кеткен жөн.
