2023 жылдан бастап еліміздегі барлық білім беру ұйымдарында жүзеге асырылып келе жатқан «Адал азамат» бірыңғай тәрбие бағдарламасы аясында Ата-аналарды педагогикалық қолдау орталықтары жұмыс істейді. Бұл орталықтар ата-аналарға тәрбиелік, психологиялық және әдістемелік бағытта көмек көрсетуге бағытталған, деп хабарлайды ALTYNQALA.KZ ақпарат агенттігі.
Жақында жүргізілген сауалнама нәтижелері бойынша, осы уақытқа дейін 3 миллионнан астам ата-ана орталықтардың қызметіне жүгініп, қажетті қолдау алған.
Мұндай орталықтарда мамандар ата-аналарға:
-
бала тәрбиесі мен дамуы бойынша кеңес береді,
-
мектеп пен отбасы арасындағы тиімді қарым-қатынасты қалыптастыруға көмектеседі,
-
қиын мінез-құлықты түзету, отбасылық дағдарыстарды шешу жолдарын ұсынады.
Орталықтардың жұмысы ата-аналардың бала тәрбиесіне белсенді қатысуына және білім беру процесіне серіктес ретінде араласуына жол ашады.
«Адал азамат» бағдарламасының мақсаты – балаға білім берумен қатар, оның жеке тұлға ретінде қалыптасуына ықпал ету, отбасы мен мектептің тәрбиелік күшін біріктіру арқылы сапалы тәрбие беру жүйесін құру.
