Ел бірлігі мен ынтымағы – Қазақстанның басты құндылықтарының бірі. Көпұлтты мемлекеттің табысты дамуы әртүрлі этностар мен мәдениеттердің өзара құрметі мен достығына негізделген. Осы орайда Қазақстан халқы Ассамблеясы елдегі татулық пен тұрақтылықты нығайту мақсатында маңызды жұмыстар атқаруда. Бұл құрылымның 30 жылдығына орай еліміздің әр аймағында түрлі іс-шаралар ұйымдастырылып, мәдени бағдарламалар өткізілуде. Солардың бірі – Степногорск қаласында өткен «Бірлік қанаттары» фестивалі, деп хабарлайды altynqala.kz
Алғыс айту күнімен қатар өткен бұл іс-шара Қазақстандағы түрлі этностардың өзара сыйластығын арттыруға, бірлікті нығайтуға және мәдени саналуандылықты кеңінен танытуға арналды. Фестиваль Қазақстан халқы Ассамблеясының 30 жылдығына орай ұйымдастырылған концерттік бағдарламамен және этномәдени бірлестіктердің жәрмеңкесімен басталды. Жәрмеңке барысында әртүрлі этностық қауымдастықтар өздерінің мәдениеті мен дәстүрлерін таныстырып, ұлттық тағамдар мен қолөнер бұйымдарын ұсынды.
Бұл өз кезегінде қала тұрғындары мен қонақтары үшін
ерекше әсер қалдырды. Бұл шараға Астана, Көкшетау, Ақкөл қалаларынан келген этномәдени бірлестіктердің өкілдері қатысты. Іс-шараның негізгі мақсаты – азаматтық қағидаттарға негізделген қазақстандық бірегейлік пен ұлттық бірлікті нығайтуға ықпал ету, «Бірлік – даму үшін!» жалпыұлттық ұранын дәріптеу, қоғамды еңбек пен кәсібилікке баулу, рухани және адамгершілік құндылықтарды насихаттау.
Мерекелік бағдарламаның салтанатты ашылу рәсіміне Степногорск қаласы әкімінің орынбасары Жанасыл Сабырұлы және Ақмола облыстық «Қоғамдық келісім» ұйымының мүшесі, «Вайнах» шешен-ингуш этномәдени бірлестігінің төрағасы Герихан Яндиев қатысты. Ресми тұлғалар өз сөздерінде Қазақстан халқы Ассамблеясының елдегі тұрақтылық пен ынтымақтастықты нығайтудағы маңыздылығын атап өтті. Фестивальге қатысушылар Мемлекеттік Әнұранды бірлесіп орындап, патриоттық рухты жоғары деңгейде көрсетті. Сонымен қатар Қазақстан халқы Ассамблеясының елдегі бейбітшілік пен татулықты сақтаудағы рөліне ерекше тоқталып, этномәдени бірлестіктердің төрағаларына қоғамның дамуына қосқан үлесі үшін алғыс хаттар табыс етілді. Мерейтой меймандары бұл іс-шараның елдегі бейбітшілік пен бірлікті нығайтудағы маңызын атап өтті. «Біз осындай шаралардың ұйымдастырылуына өте қуаныштымыз.
Бұл – елдегі татулық пен ынтымақтастықтың нақты көрінісі. Әр ұлт өкілдері өз мәдениетін таныстырып, ұлттық дәстүрлері мен өнерін ортаға салды. Бәріміз бір шаңырақ астында тату-тәтті өмір сүріп жатқанымызды тағы бір мәрте сезіндік. Қазақстан – ортақ үйіміз, ал бірлік пен ынтымақ – оның ең басты құндылығы!» деп фестиваль қатысушылары өз ойларын білдірді. «Бірлік қанаттары» фестивалі ел тұрғындарының достық пен өзара сыйластыққа негізделген қарым-қатынасын нығайтуға бағытталған маңызды шара болды.
