Алматы облысы, Алмалыбақ ауылы.30 маусым күні ауылдағы футбол алаңында 10 жастағы балаға ит шабуыл жасап, ауыр жарақат алған болатын. Оқиға орнына ең бірінші болып жеткен ауыл тұрғыны Серікбек Сақайбаев баланы ажалдан аман алып қалды. Ол өзінің өміріне төнген қауіпке қарамастан, итпен арпалысып, оны залалсыздандырған, деп хабарлайды ALTYNQALA.KZ ақпарат агенттігі.
Қарасай ауданы әкімінің аппараты бұл оқиғаны нағыз азаматтық батылдық пен ерлік үлгісі ретінде бағалады.
Серікбек Сақайбаевтың ерлігі ескерусіз қалмады. Оның құрметіне арнайы марапаттау рәсімі ұйымдастырылып, шара барысында Қарасай ауданы әкімінің міндетін атқарушы Рустам Атшабаров оған алғыс хат пен демеушілер атынан ақшалай сыйлық табыстады.
Салтанатты жиынға аудандық полиция басқармасының бастығы Нұсқабек Зауланбаев пен төтенше жағдайлар бөлімінің жетекшісі Бақыт Шәріпбеков те қатысып, өз ризашылықтарын білдіріп, естелік сыйлықтар мен алғыс хаттар табыстады.
Аудан ақсақалдар кеңесінің төрағасы Сағат Мәсімақынов бата беріп, мұндай ерлік елге үлгі болу керектігін айтты.
“Бұл жағдай — әрқайсымызға үлкен сабақ. Қоғамдық қауіпсіздік мәселесінде жауапсыздық пен немқұрайлылық ауыр қайғылы жағдайларға алып келуі мүмкін. Иттердің заңсыз немесе бақылаусыз ұсталғанын байқасаңыз, міндетті түрде құқық қорғау органдарына немесе аудандық әкімдікке хабар беруіңіз керек”, — делінген Қарасай ауданы әкімдігінің мәлімдемесінде.
Әкімдік сондай-ақ жарақат алған балаға денсаулық тіледі және жағдайды өз бақылауында ұстап отырғанын жеткізді.
“Азаматтардың өмірі мен қоғамдық қауіпсіздік — біздің басты басымдығымыз”, — деді әкімдік өкілдері.
Айта кетейік, Бас прокуратура бұл оқиға бойынша тергеу ісі ерекше бақылауда екенін мәлімдеген.
